اللاعيبه فى الكوره 3 أنواع 
لاعب فنى : وهو اللى بيعتمد ع السرعه و مهراته الفرديه
لاعب تكتيكى : اللاعب اللى بيعتمد على التمركز والتحرك فى الهجوم وكيفية التمركز فى الدفاع 
 لاعب تكنيكى : وهو اللاعب اللى بيكون عنده دقه عاليه أوى فى رجله بيعرف ازاى يباصى وازاى يرفع وازاى يشوط مع طبعا العنايه بتوقيت خروج الكوره ..

طبعا روبيرتو فيرمينو محدش يقدر يختلف على امكانياته الفرديه وانه واحد من أفضل اللاعبين الفنين ده غير انه واحد من أذكى اللاعبين على مستوى التحرك الفردى والجماعى وخلق المساحات والتمركز بين وداخل الخطوط .

فى ماتش ليفربول وويست بروميتش روبيرتو ديناميتو أظهر ذكاء كبير منه فى تحركه فى الدقيقه 48 
 والشرح هيوضح فى الصور

 

 

1- الصوره رقم (1) هنا الكوره مع لوفرين وفريق ويست بروميتش بيضغط من قدام عشان يمنع ليفربول من بداية الهجمه , كوتينيو (الدايره السوده) هو الحل واللى لو وصلتله الكوره هيقدر يتحول بليفربول من نص ملعبه لنص الملعب التانى ويخلص الفريق من ضغط البروم ويخلى 5 لاعيبه من البروم خارج اللعبه لكن هو حاليا مغلق عليه تماما زاوية التمرير , نفس الأمر على روبيرتو فيرمينو (الدايره الحمرا) اللى مغلق عليه تماما زاوية التمرير بسبب اللاعب اللى قدامه والمدافع (الدايره الزرقا) اللى هينقض عليه أول ماتوصله الكوره .

 

2- الصوره رقم (2) هنا الكوره اتنقلت من لوفرين لأيمرى فى محاوله لخلخعة دفاع البروم وفتح زاوية تمرير لكوتينيو , ولما فيرمينو قرب أكتر من نص الملعب عشان يتخلص من الرقابه اللى عليه وجد نفسه مراقب من لاعب نص الملعب , والمدافع اللى وراه خرج من مكانه عشان يضغط على كوتينيو ويمنع أى محاوله لوصول الكوره اليه

 

3- الصوره رقم(3) بعد ماخرج المدافع من مكانه ساب وراه مساحه كبيره لاحظها فيرمينو , فيرمينو لاعب ذكى وأكيد هو عارف ان المدافع شايفه وعارف انه رايح يتحرك فى المكان الفاضى وراه , لكن فيرمينو لما جرى فى المكان ده حط فى دماغه احتمالين ,الأول هو انه تتلعبله كوره طويله فى ضهر المدافعين , والتانى هو انه يسحب المدافع ده ويرجعه ورا عشان يحرر كوتينيو وتبدأ عملية التحول

 

4- فى الصوره رقم (5) فعلا المدافع كان ملاحظ فيرمينو وأضطر غصب عنه انه يرجع تانى لمكانه الأساسى عشان يغطى المساحه اللى اتحرك فيها فيرمينو , لكن فى نفس الوقت هو ساب كوتينيو حر بعيد عن الضغط , وهو ده الحل التانى اللى كان بيهدف اليه فيرمينو

 

أحيانا اللاعب مش لازم يعمل حركه فنيه حلوه برجله أو يفتح Sprint كبير او يشوط كوره جامده عشان نقول عليه لاعيب كويس 
 فى لاعيبه بمجرد تحرك ذكى منهم فى مكان بدون أى كوره يخلينا نشوف فيهم حاجه أجمل بكتير من الحاجات اللى بتتعمل بالكوره

وفيرمينو فى كل ماتش بيزيد اعجابى بيه بسبب ذكائه ذكائه ذكائه 
 روبيرتو ديناميتو واحد من أذكى اللاعيبه اللى شوفتها فى حياتى

يمكن روبيرتو ديناميتو من اللاعبين النادرين اللى بنشوفهم بيجمعوا بين ال3 أنواع من اللاعبين (لاعب فنى و تكتيكى وتكنيكى)